فى أوقات الحر الشديد خاصة فى شهرى يوليو وأغسطس ، بيكون فى خطورة أكبر على مرضى السكر إنهم يصابوا بالجفاف أو ضربات الشمس الحارة بسبب إرتفاع درجة الحرارة والرطوبة.
النهاردة هنعرف مع بعض إزاى نواجه مخاطر إرتفاع درجات حرارة الصيف ونتأقلم عليه كأبطال السكر.
أول سؤال بيشغل بالنا ليه أبطال السكر للنوع الأول أو الثانى بيكونوا أكثر عرضة لمخاطر السكر عن غير المصابين بالسكر.
مشكلة مرض السكر هى انه بيقلل من قدرة الجسم على تنظيم تحمل درجة الحرارة المرتفعة و بتخلى صعب على الجسم انه يتحكم فى مستويات السكر فى الدم.
كمان مضاعفات السكر ممكن تأثر على قدرة الجسم فى التأقلم مع درجات الحرارة زى تلف الأوعية الدموية والأعصاب بتأثر على الغدد العرقية فلما بيقل خروج العرق ،الجسم بيفضل محتفظ بالحرارة وده ممكن يؤدى للإرهاق الحرارى أو ضربة الشمس.
كمان تنظيم نسبة السوائل فى الجسم ، عدم شرب كمية كافية من السوائل والمياه ممكن يرفع نسبة السكر فى الدم ، وده ممكن يخليه يحتاج إلى التبول أكثر فتزيد نسبة حدوث الجفاف.
طيب إزاى نتغلب على تعب حر الصيف كبطل من أبطال السكر؟
إلعبها صح:
أول حاجة : خلى بالك درجات الحرارة المرتفعة ممكن تغير من طريقة إستقبال وإستخدام الأنسولين ، فممكن تحتاج تتابع مع طبيبك المعالج بفحص نسبة السكر بشكل متكرر وتعديل جرعة الأنسولين أو الدواء المستخدم وتعديل جرعات الأكل والشرب.
حكمة الصيف: إشرب مياه كتير حتى لو مكنتش عطشان علشان تحمى نفسك من الجفاف.
طب ايه نصايح تانيه ممكن تكون مفيدة لمرضى السكر؟
- لو بتلعب رياضة اتاكد انك تفحص نسبة السكر فى الدم قبل وبعد ممارسة الرياضة وتابع مع طبيبك لو احتجت تعديل جرعتك.
- خلى بالك من المشروبات اللى بتحتوى على كافيين زى القهوة أو المشروبات الرياضية أو الكحوليات لأنها بتزود من فقدان سوائل الجسم وزيادة نسبة السكر فى الدم.
- خلى بالك أوعى تخزن الأنسولين أو دواء السكري عن طريق الفم في ضوء الشمس المباشر أو في سيارة ساخنة ، ولو مسافر حاول تحتفظ بالدواء فى التلاجة أو فى icebox .
- دايما استعمل واقى من الشمس عند الخروج فى الشمس لأن حروق الشمس ممكن ترفع مستويات السكر فى الدم.
- كمان الملابس الخفيفة والقطنية بتساعد الجسم على عدم الإحتفاظ بالحرارة العالية.
- حاول بقدر الإمكان التواجد فى الأماكن المكيفة سواء فى عملك أو أنك تروح مكان مكيف علشان تفضل فى درجة حرارة منخفضة.
- فى المصيف ارتدى حذاء البحر علشان حماية القدمين من حروق الشمس والحرارة.
- وأهم حاجة متخليش حرارة الصيف تضايقك ، تقدر تعمل كل حاجة طالما بتتبع تعليمات طبيبك المعالج و بتتابع نسبة السكر فى الدم بإنتظام.
ولو عندك أى أسئلة أو إستفسارات طبية أو بخصوص مؤسسة مصر بلا مرض تقدر تبعتهالنا على صفحة الفيسبوك وهيتم تحويلها للرد من خلال الطبيب المختص.
عيادة الدقى:
01559608826 –0233383566
العنوان : 34 شارع الدقى –بجوار حلوانى مجاهد
عيادة شبرا الخيمة :
01227630622-0244763635
العنوان : 14 شارع المهدى –خلف كريستال عصفور-شبرا الخيمة (أمام مدرسة الإعدادية بنات )
والان فى عيادة شبرا مصر :
01222657984 – 01222657986
العنوان: ٨٧ شارع شبرا – امام سوبر ماركت العابد